Paglalakbay sa Bundok Banahaw (AP)

Ang Bundok Banahaw ay matatagpuan sa paligid ng hangganan ng mga lalawigan ng Laguna at Quezon sa Timog na bahagi ng Luzon. Isang taong nagngangalang Agripino Lontok ang sinasabing nakatanggap ng mensahe mula sa Panginoon na gawing sagradong lugar ang bundok na ito. Mula noon ay nagkaroon na ng iba’t-ibang mga sekta mula sa paanan hanggang sa tuktok ng bundok, nagkaroon ng maraming sagrado at simbolikong lugar, at nagtayo ang mga ito ng mga pook sambahan upang lumaganap ang kani-kanilang mga grupo. Ilan sa kanila’y pinaniniwalaang si Rizal ay isang propeta ngunit ang iba sa kanila’y itinuturing siya bilang kalebel o kasintaas ng Panginoon. Sa Bundok Banahaw ay matatagpuan ang napakaraming puwesto o mga lugar na may sagrado at simbolikong kahulaugan at sinasabing pinangyarihan ng ibang mga kaganapan sa buhay ni Hesukristo. May mga nagsasabi kasi na noong panahon ng digmaan sa Israel ay lumipat sa bundok na ito si Hesukristo upang pansamantalang manirahan.

Sa napakaraming puwesto sa Bundok Banahaw, nabigyan kami ng pagkakataon upang mabisita at maranasan ang sinasabing milagro ng ilan sa mga ito. Una naming napuntahan ay ang malaking pintuan patungo sa pinakamalaking simbahan doon. Ang pintuang ito ay itinuturing nilang pintuan patungo sa langit. Nakaguhit sa pintuang ito ang iba’t-ibang mga bandila ng mga bansa sa buong daigdig na sumisimbolo sa maluwag na pagtanggap ng mga tiga-roon sa kahit na sinong nais pumasok. Sa loob makikita ang Ciudad Mistica de Dios, isang simbahan na ipinagbabawal ang pagpasok ng mga hindi kabilang sa kanilang grupo. Mabuti na lamang at nagkaroon pa rin kami ng pagkakataon na masilip ang loob ng simbahan. Nang panahong iyon ay may ilang nagdadasal sa loob kaya’t iniwisan naming gumawa ng kahit na anong ingay. Sa loob, ang lahat tao ay nakaputi at nakabelo at karamihan sa kanila’y mga kababaihan. Makikita ang tatlong bintana sa loob na kulay pula, puti, at asul na sumisimbolo sa watawat ng Pilipinas. Ang nagsimula ng kanilang grupo ay si Maria Bernarda Balitaan at itinuturing nila ang labindalawa sa ating mga pambansang bayani bilang mga apostoles ni Hesukristo at ni Rizal.

Pangalawang puwesto ay ang aklat ng buhay, isa itong malaking tipak ng bato na ang hitsura’y mistulang isang ibrong nakabukas. Ayon sa mga tao roon, kapag nagtirik ka ng kandila at nagdasal habang isinusulat ang pangalan ng taong ipinagdadasal mo gamit ang iyong daliri doon sa aklat ng buhay, ay matutupad ang anumang hilingin mo sa Panginoon.

Pangatlong puwesto ang maliit at napakasikip na kweba ng husgado. Sinasabing ang kwebang ito ang susukat sa dami ng iyong mga kasalanan. Lumuluwag o sumisikip daw ito depende sa iyong mga pagkakasala sa Panginoon. Kung marami kang sala, mahihirapan ka raw sa paglabas ng kwebang ito at maari ka raw magkaroon ng mga galos at sugat.

Pang-apat na puwesto ay ang burol ng kalbaryo. Sinasabing dito raw sa burol na ito ipinako at namatay si Hesukristo. Ang pag-akyat sa burol ay isang malaking sakripisyo para sa Panginoon ngunit lagi dapat nating tandaan na wala pa ring makahihigit sa ginawa ng Panginoon para sa ating mga makasalanan. Sa tuktok ng burol ay matatgpuan ang tatlong krus na katulad ng nabanggit sa Bibliya kung saan namatay si Hesukristo. Naroon din ang isang rebulto ng La Pieta at ang rebulto ng isang trianggulo may mata sa gitna at may pakpak na kulay asul at pulat na sumismbolo pa rin sa watawat ng Pilipinas. Kita sa paligid ang magandang tanawin sa ibaba at ang kalapit nitong bundok Cristobal o mas kilala sa tawag na Devil’s Mountain o Bundok ng Demonyo. Dito sinasabing nagtago si Macario Sakay nang magi siyang bahagi ng KKK upang hindi matagpuan ng mga tumutugis na Kastila.

Panghuling pwesto ay ang Ilog Lagnas, ang sinasabing milagrosong ilog sa Bundok Banahaw. Mula sa itaas ay kailangnang bumaba sa hagdan na may mahigit 270 na baitang upang maka-abot sa ilog na iyon. Sinasabing kapag tama ang iyong bilang ng mga baitang ay maari kang humiling sa Panginoon at matutupad ito. Bago kami lumubog sa tubig ay pinadaan kami sa isang umaagos na tubig mula sa tuktok ng bundok na dumadaan sa ugat ng mga halaman doon. Ang tubig sa ilog ay napakalamig at pinawi nito ang lahat ng pagod na naranasan namin sa buong araw na paglalakad. Maraming nagsasabi na ang tubig sa ilog na ito ay nakakapapagaling ng sakit at nakakapagpakinang ng mga diyamante. Mayroon ding rebulto ni Birheng Maria malapit sa ilog upang magbigay pugay sa kanya.

Ang araw na iyon ay punung-puno ng kasiyahan at bagong mga kaalaman. Isa na naman itong kaganapn sa aming mga buhay na naghatid sa amin ng maraming aral sa buhay na siguradong ibibilang namin sa mga pinakamahalagang ala-ala sa aming mga buhay